CH’E’ BELLA CHISTA!

                                                             CH’E’ BELLA CHISTA!

 

‘Na vota lu trenu, era sempri chinu ‘nchinatu di genti e tanti voti s’arristava a l’addritta pi la cunfusioni chi c’era.

La genti ja a Palermu o a Trapani pi spirugghiari ‘ncartamenti o pi malatii, ma c’eranu puru chiddi chi purtavanu virdura, ova, addini pi vinnili fora paisi. Mmezzu a tutta sta fudda c’era puru quarcunu chi viaggiava a scavallu senza pizzinu o facia lu pizzinu pi lu figghiu grannuzzu cu lu pizzinu di picciriddu. ‘Nsustanza, quannu passava lu perciabiglietti c’eranu  sempri vuci e discussioni..

‘Na vota ‘na bedda signura vata, mpustata bbona di pettu, stava ennu a Palermu a truvari a so patri  a lu spitali. Idda avia fattu lu pizzinu a la stazioni e si l’avia  sarvatu nta la borsa.

Nta lu carruzzuni c’era cavuru, fudda, discussioni, lu trenu dava trantuluna. Camina chi ti camina, lu trenu paria un arrivari mai.  Stanca morta, a un certu puntu la signura s’addummisciu.

“Biglietti, prego!!” A la signura, chi s’avia appena appena appinnicatu, ‘sta parola ci ntrunà nta l’aricchi e la fici arrispigghiari. Idda, pi lu scantu di li latri e p’un si fari arrubbari, s’avia pigghiatu lu viziu di mettisi li sordi e li pizzina nta lu pitturinu. Perciò, rispigghiata a corpu di sangu, pi la prescia s’avia scurdatu di circari dintra la borsa, e subitu nfilà la manu mmezzu li minni pi pircari lu bigliettu chi ci avianu addumannatu.

Circau a manu ritta e nun truvau nenti: “ch’e bella chista” ci abbattiu! Circau a manu manca e nun truvau puru nenti “ch’è bella chist’autra! Ancora sbauttuta pi lu sonnu, turnau a pruvari pi tanti voti. Lu pizzinarui era sicuru d’aviri a chi fari cu ‘na pirsuna senza bigliettu, perciò arrabbiatu cidissi:-

 “Signura, sintissi a mia: No pi vantarimi, ma iu di sti cosi mi ni sentu! Li mittissi tutti dui fora e doppu ci lu sacciu diri iu, s’è cchiù bedda chista o s’è cchiù bedda chist’autra”.

VITO MARINO.